Алмазбек Атамбаевдин жан сакчысы кармалды
Аскер прокуратурасы тарабынан УКМКнын 9-кызматынын мурунку кызматкери (Мамлекеттик күзөт кызматы) Канат Сагымбаев кармалды. Бул тууралуу анын жактоочусу Замир Жоошев соцтармактагы өз баракчасына жазды.
Анын айтымында, Канат Сагымбаевди 7-августтагы Алмазбек Атамбаевдин үйүнүн ичиндеги окуяга шектүү катары кармашкан.
-7-августта Алмазбек Атамбаевдин үйүнүн ичинде эмне болгондугун баары эле билишет – Канат экс-президентти кайтарган, ал эми бет кап кийген адамдар Атамбаевди кармаганы жатышпады беле.
Бет кап кийгендер ким болгон? Аларды экс-президент да, анын жан сакчысы да биле алышкан эмес.
Мамлекеттик күзөттүн кызматкери атайын кызматтын кызматкерлери келгенин билгенинде деле, ал экс-президентти кармап аларга өткөрүп бере алмак эмес. Анткени Сагымбаевге аны кайтаруу тапшырмасы берилген жана УКМКнын 9-кызматы тарабынан бул тапшырма алынган эмес, - деп жазган ал.
