Шахмат: Айжан Алымбай кызы Азия чемпионатынын турунда атаандашы менен тең чыкты
Кыргызстандык Айжан Алымбай кызы Азия чемпионатынын 5-турунда атаандашы менен тең чыкты. Шахмат боюнча чемпионат ушул күндөрү Бириккен Араб Эмиратынын Шардж шаарында өтүүдө.
Мелдештин расмий сайты маалымдагандай, кыргызстандык оюнчу бешинчи турда индиялык Шристи Шетт менен тең чыккан. 5-турдун жыйынтыгы менен Айжан мүмкүн болгон беш упайдын үчөөсүн топтогон. Турнирдик таблицада кыргызстандык оюнчу 36 оюнчунун ичинен 14-орунда турат.
Ал эми Айжаркын Шангыз кызы бешинчи турда өзбекстандык Сарвиноз Курбобоевага утулуп, алты баскыч төмөн түшүп, учурда турнирдик таблицада 18-орунда келе жатат.
Ал эми өспүрүмдөр арасындагы мелдеште Жохар Жаанбай уулу да бешинчи турда ирандык шахматчы Хоссейнипур Мехдиге утулуп калган. Учурда кыргызстандык оюнчу 34 оюнчунун ичинен 15-орунда келе жатат.
Белгилей кетсек, чемпионаттын алкагында шахматчылар 10 тур өткөрүшөт. Мелдеш 7-апрелде аяктайт.
