Майчиев: ЖМКга чыккан материалдар боюнча 30-40тай даттануу келип түштү

"Учурда ЖМКга чыккан материалдар боюнча жеке, мамлекеттик жана юридикалык жактардан 30-40тай даттануу келип түштү. Алар көбүнчө ар-намысына шек келгенин айтып кайрылышат. Көбүнчө ЖМКга чыккан материалдар ушак жана бир тараптуу болуп калууда. Биз ошондойго жол бербөө боюнча аракеттерди көрүп атабыз",- деп ЖМКнын үстүнөн түшкөн даттанууларды кароо комиссиясынын төрагасы Шамарал Майчиев бүгүн, 21-февралда, маалымат жыйында билдирди.

Ал даттанган тараптар соттошууга чейин барбоону каалай турганын белгиледи. "Ар намысыма шек келди деген тарап, болгону Жалпыгоо маалымдоо каражаттары өз катасын моюндап, тактоо берүүсүн гана каалашат. Биз тараптарды жараштырууда эки тарапты тең чакырабыз. Биздин ишибиз көбүнчө кеңеш берүү болуп саналат", - деди ал.

Майчиев ошондой эле даттануулар көбүнчө гезит-журналдарга чыккан материалдар боюнча болорун кошумчалады. "Радио менен ТВга чыккан материалдар убактылуу гана болуп, унутулуп калат. Ал эми гезит-журнал жана интернетке чыккан материалдарды дайыма окушат. Ал окуган кишинин улам-улам жинин келитирип, "ушул журналисттердики жетти" деп туруп, анан бизге кайрылууга түртөт",- деди ал.