Иса Өмүркулов: Акча жок туруп, мэрди сындагандан пайда жок
"Акча жок туруп, мэрди сындагандан пайда жок", - деп Жогорку Кеңештин бюджет жана финансы комитетинин жыйынында Бишкектин мэри Иса Өмүркулов билдирди.
Жыйында Ош жана Бишкек шаарларынын статусу жөнүндөгү мыйзам долбоору каралууда.
Өмүркулов мэрди сындаса боло тургандыгына макул. Ошентсе да шаардык муниципалитет мурдагыдай эле Финансы министрлигине көз каранды экенин эске алуу керек. Министрлик шаардын муктаждыгын жапкыдай каражат бөлбөйт. "2013-жылы капиталдык салымга Финансы министрлиги болгону 200 млн сом гана карап атат. Биздин муктаждыктарыбызга карабастан "Капиталдык салым" беренеси боюнча каржылоону жогорулатпай атат. Анда мэр борбор калааны курчап турган 50 жаңы конушту кантип жакшыртат? Ал жакта электр, суу, жол жок. Бирок ага да карабастан шаардын эли көбөйүүдө. Бүгүн Бишкекте дээрлик 1 млн 350 миң адам жашайт. Бала бакча жана мектеп жетишпейт", - деди Иса Өмүркулов.
